2025a urte bizia eta lorpenez betea izan da CAVIAR ikerketa-taldearentzat. Proiektuak amaitu ditugu, ekimen berriei ekin diegu, artikuluak eta liburuak argitaratu ditugu, biltzarretan parte hartu dugu eta ekintza ugari antolatu ditugu gure lana herritarrengana eta komunitate zientifikoarengana hurbiltzeko.
Proiektuak: etapak itxiz eta bideak irekiz
Aurten Gipuzkoa Nodal proiektua arrakastaz amaitu dugu. Proiektua lurralde-mugikortasuneko sare bat bultzatzea zuen heluru, benetan interkonektatutako sare gisa funtzionatzeko gai izango zena. Honi esker, aurrera egin da Gipuzkoa polizentrikoa lortzeko bidean, elkarri lotutako asentamendu-sistema gisa bere benetako hiri- eta lurralde-izaera aitortuz.
2025 honetan ere hiru proiektu berri jarri ditugu martxan: ETXEADIN, ETXELAGUN I eta FOOD FOREST.
ETXEADIN (laster informazio gehiago) ETXELAGUN proiektuaren jarraipena da, etxebizitzak eraldatzeko eredu berritzailea, bakardadea arintzeko eta adinekoen autonomia handitzeko diseinatua.
ETXELAGUN I diziplina anitzeko eta erakunde arteko ikuspegia du, eta lehenengo ETXELAGUN etxebizitza diseinatzea du helburu, bizitza-luzerarako eta bertan bizi direnen bakardade-arriskua prebenitzeko eta arintzeko. Etxebizitza honek bizitza osoko proiektu bat errazten du, autonomia eta etxeko barne-espazioaren gozamen aktiboa sustatzen ditu, eta horretarako teknologia digitalak integratzen ditu. Lehenengo etxebizitza Beasainen eraikiko da.
FOOD FOREST proiektua, aldiz, Elikagaien Basoetarako (Food Forests, FF) negozio-eredu bat garatzea du helburu, elikagaiak ekoizteko alternatiba iraunkor gisa. Gainera, beharrezko lege-aldaketak sustatu nahi ditu, eta horiek ezartzeko laguntza instituzionala ezarri. Horretarako, erkidegoko elikagaien basoen Europako sare bat sortzen ari gara (Community Food Forests, CFF), hezkuntza-programak inplementatu eta aldaketa bultzatzeko datuak bilduko dituena. Sare honek gizarte-kohesioa indartuko du, eta elikaduraren ekoizpenarekin eta hiri-inguruneekin lotutako gizarte-, ingurumen- eta osasun-erronkei helduko die.
Argitalpenak eta ekoizpen zientifikoa
2025ean guztira 14 artikulu zientifiko, 4 biltzar ekarpen, 5 liburu-kapitulu eta liburu bat argitaratu ditugu, gure ezagutza-ekarpena indartuz eta gure presentzia komunitate zientifiko eta sozialean sendotuz.
Urteko mugarri berezia izan zen Xabier Barrutieta Basurkoren “Energia positiboko eraikinen diseinua, autosufizientzia energetikoa eta eguzki-integrazio fotovoltaikoa” doktore-tesiaren defentsa. 2025eko urtarrilaren 31n egin zen, Donostiako (Gipuzkoa) Antonio Beristain Auditorioan (Carlos Santamaría Zentroa). Tesia Rufino Javier Hernández Minguillónek eta Olatz Irulegi Garmendiak zuzendu zuten.
Ekitaldiak eta ekintzak
Urtean zehar hainbat ekintza eta topaketa bultzatu ditugu. Otsailean Gipuzkoa Nodal Jardunaldiak antolatu genituen eta HariaK 2025 Ekosistema Topaketan parte hartu genuen. Martxoan FOOD FOREST proiektua aurkeztu genuen herritarren aurrean, eta apirilean elikagaien basoei eta permakulturari buruzko lehen ikastaroak eman genituen Artaxoan.
Maiatza oso hilabete aktiboa izan zen: bi mural kolaboratibo margotu genituen Iruñeko Arrotxapea auzoan, 8th General Assembly oPEN Lab izan zen eta Korale Community Rail 2024-28 III. topaketan parte hartu genuen, besteak beste. Ekainean Online Kick-Off meeting FOOD FOREST eta General Assembly PERSIST ospatu genituen, eta irailean, 1st General Assembly FOOD FOREST ospatu genuen.
Urrian zehar KALELAGUN gida aurkeztu genuen Beasainen eta Energies légères: usages, architectures, paysages erakusketa antolatu genuen Mugal/Bienalaren barruan. Azaroan, agenda biziarekin jarraitu genuen: Zientzia Astearekin, Arrotxapeko Energiaren Festarekin, Beasaingo etxebizitzetako tailerra eta Artaxoako elikagaien basoei eta permakulturari buruzko ikastaro berriekin itxi dugu, arkitekturako bizi-kalitatearekin eta komunitatearekiko interakzioarekin dugun konpromisoa indartu duten topaketa, tailer eta ekintzen urte oso bat sendotuz.
